يعني كتير//نور
يعني كتير
يعني الحزن خد منك رَقات
ورقات
وخلاص خلصت
حددته مصير؟!
يعني الخوف حضن روحك
ولما جيت ترجعها
لقيتها أسير
وبرضه رفضت تتكلم
وتكسر سجن سجانك
وآه دا الواقع الغالب
وليه التغيير؟
وليه التفكير ووجع القلب
ف إيه يعني؟!
سؤال اليأس وجوابه
وصوت قفلةْ
بإيد بابه
وفكرة إن
الحياة موتة
وموت الروح
مالوش تفسير
دا صمت كتير
بآلامه وأسبابه
هكمل فيه
وأقول للفرح لما يغير
سلام وارحل
أنا فصّلت توب ف الوحل
وعشت الموت
ومت حياة
وإيه يعني؟
أعيش أو أموت
دا طعم الماضي ومخاوفي
خلاص يا ابني سبى عقلي
ومتربع ف جوف الوقت
وهات يا صمتْ
وكفاية
وجعت الموتة بالتفكير
وضحكة أخيرة مالهاش حظ
ولا معنى
وإيه اللي اتقال؟
أنا نسيته
أنا تايه وخايف أفوق
من التوهة
وخايف ريحة الأنوار
تهز مخاوفي جوايا
وألقى الشمس تغلبني
وتاني أعيش
وياخدوني ف طابور العيش
ف أتوه تاني
وأموت مرة
على مرة
م انا ميت
سيبوني أعيش
ف دي موتة
وردوا القبر
لا لأ
قصدي الشيش
تعليقات
إرسال تعليق