آه من خطاوينا//نور محمد

آه من خطاوينا اللي دوّبها المطر 

بالأمر..

مش منا إحنا 

دقنا الشرّ..

وآه م النسمة ميالة على ضوء الهوى المبلول

ولأنه اتبل من عبطه!

هنذلّه أكيد ف حفلة شِعرْ.. 

مش هو اختار يدبّ خناقة وسط نهارْ؟

وقال والله

مَ نا مصالح؟

وجوا القهر راح 

شاطب على الذكرى وقام سارح؟

استنى بس من فضلك

مش احنا مشينا 

من جوانا ف امبارح؟

لحقت نسيت؟

مودّعني ف طريق البيت! 

أنا آسفة.. 

ف لحظة رجعتْ..

طب فاكر حاجة 

م اللي كان؟ 

وأفعالنا دي المنسوبة

لنفوسنا وللشّيْطان؟

بقولك إيه

خلاص انا خفت

وكمان قفّلتْ..

دا حوار الضمير هيبان

ويلا تاني ..

قول ويايا من صمتك على دمعي: 

وآه م الواقع..

ومن يومنا اللي أصبح خيط من الأحزان

وهمّه يلقّن المخطوف من الشاشة اللي ف قلوبنا 

قدرنا الواعظ

المنشور في عروقنا ومتثبّت من قبل بوقت 

ع الشبابيك و الجدران

وآه م الدنيا دوارة

على روسنا

تواسينا 

وهي هي بتدوسنا..

وتشْمَت فينا 

وتغفّل أمانينا 

بطعنة يأس... 

وآه منهم شتا ونسمة،

وذكرى وحب.. 

ف حرف اترص 

وآه م الدنيا والأحوال لكن منا 

واحنا الجاني والمدبوح على كيفنا.. 

لا آه ولا بأسْ..

نور