صورة وبعد/نور محمد
خلينا بعيد..للأمان بس
مش أكتر
أيوا كدا....
شكرا كتير جدا
أصل أنا بضعف
هل كان المفروض م أقولش؟
ومين فينا حبيبتي بيقرب
وم بيضعفش
طيب خلاص
خليك هناك ..
وشيل صوتك المخنوق
من الصورة اللي ع المكتب
وارفع عينيك ف عز البرد
بالصدفة وبالمقصود
ما بحبش أنا الغموض
م أنا فاهم إني اترسمتْ
ف دماغِك الحلوة
م الأول
حبيب موعود
م الأول زي م المية
م فيش فرق
شَبكِتْ عينيك ضحكتي
والخوف جوايا
منّي ومنك اتضاعف..
أنا إنسانة
غرقانة بلا رؤية...
أنا خايفة
أكيد خايفة
عينيك مجهولة بالنسبالي
أنا عارفة..
أصل إنت أكيد مش فاهم
أنا لما أمسح على صورة
بلقى نفسي جواها
ومش بخرج ولا برجع
ولا بسكت ولا بنسى
ولا بهدا ولا بتهد
طب اهدي شوية
من فضلك
أنا هبعد بعيد أكتر
هيرضيكي
أدوب ف البعد؟
طيب....بس...
لأ استنى...
مش هقدر أتحمل..
كمان إنت مش عارف
إن أنا ف رسمة م الماضي
من قبل اللقا المرصود
ف سوء الفهم...
ف ذات الصورة
ف البرواز
ومنقوش عمري
على خوفي
ف لحظة صد
فكل م تيجي تندهلي
هغيب وارجع
وأموت وأعند
وتاني ارتد
للأوجاع
لإحساسي اللي زي
الإبرة ف المعنى
وزي امبارح المكتوب
على باب المنى
الخايبة
بإني تعبتْ م التهويش
والتشويش على عقلي
وإسكاته
"وتسويفٌ بمضغ علاج"
كان الواضح عليه
مغشوش
وصورتك واقفة ع العلبة
تألّف قلبي ع العصيان
وف الأوهام
ورغم إن أنا شايفة
بكل ما فيّ تخوينك
وموت ثقتك
ف أَمثالي
من المساكين
هكون قد ضعت
نور
تعليقات
إرسال تعليق